Թարմացվել է 20.01.2011թ. 

F.A.Q.

1.Ովքե՟ր կարող են մասնակցել ապահովագրության իրականացման գործընթացին:

- ապահովագրողներ` ՀՀ օրենսդրությամբ սահմանված կարգով ապահովագրական գործունեության լիցենզիա ունեցող իրավաբանական անձինք:

- ապահովադիրներ` ապահովագրության պայմանագրի այն կողմը, որին կամ որի մատնանշված անձին (շահառու) ապահովագրողը պարտավորվում է հատուցել ապահովագրության պայմանագրով նախատեսված իրադարձության (ապահովագրական պատահարի) տեղի ունենալու արդյունքում պատճառված վնասը կամ դրա մի մասը կամ տրամադրել որոշակի գումար պայմանագրով նախատեսված իրադարձության (ապահովագրական պատահարի) տեղի ունենալու ուժով` ըստ ապահովագրության պայմանագրի պայմանների:

- ապահովագրական բրոքեր` ՀՀ տարածքում ապահովագրական բրոքերային գործունեության լիցենզիա ունեցող առևտրային կազմակերպություն, որն իրականացնում է ապահովագրական միջնորդային գործունեություն` անձի կողմից ապահովադրի, իսկ վերաապահովագրության դեպքում` ապահովագրական ընկերության անունից և հաշվին:

- ապահովագրական գործակալ` ՀՀ տարածքում ապահովագրական գործակալի գործունեություն իրականացնելու համար Կենտրոնական բանկի ապահովագրական գործակալների ռեգիստրում հաշվառված անձ, որն իրականացնում է ապահովագրական միջնորդային գործունեություն` անձի կողմից մեկ կամ մի քանի ապահովագրական և/կամ վերաապահովագրական ընկերությունների անունից և հաշվին:

2.Ինչպե՟ս է իրականացվում ապահովագրության գործընթացը: 

- ապահովագրողի ընտրություն և նրան ապահովագրության օբյեկտի վերաբերյալ անհրաժեշտ տեղեկությունների տրամադրում (անհրաժեշտության դեպքում բրոքերի օգնությամբ),

- ապահովագրության պայմանների, մասնավորապես` ապահովագրական ռիսկերի ցանկի, բացառությունների և հատուցման պայմանների համաձայնեցում,

- ապահովագրության պայմանագրի կնքում,

- բրոքերի կողմից ապահովագրության պայմանագրի սպասարկում` ներառյալ հայցերի կարգավորումը:

Ապահովագրական ընկերության  ընտրությունն արդյունավետ կլինի կատարել ապահովագրական շուկայից իրազեկ մասնագետի օգնությամբ:

3. Ինչպե՟ս է որոշվում ապահովագրավճարի գումարը:  

- ապահովագրավճարը որոշվում է ընտրված ապահովագրական սակագնի և ապահովագրական գումարի հիման վրա,

- ապահովագրության պայմանագրի հուսալիությունը չի գնահատվում բարձր կամ ցածր ապահովագրավճարով, քանի որ ապահովագրության մեջ չկան բարձր կամ ցածր սակագներ, այլ կան ընտրված ռիսկերին համապատասխան սակագներ: Օրինակ` ավտոմեքենայի ապահովագրության պայմանագրում առևանգումը, գողությունը բացառելու դեպքում ապահովագրավճարը կարելի է նվազեցնել մինչև 50%:

4.Ո՟ր դեպքերում է տրամադրվում ապահովագրական հատուցում: 

Այն դեպքերում, երբ պատահարը կրում է պատահական բնույթ, և ապահովադրի կողմից չէր կարող կանխվել, ապահովագրական հատուցում է տրամադրվում, եթե պայմանագրում նման դեպքը նշված չէ բացառությունների ցանկում:

5.Ապահովագրություն  “բոլոր ռիսկերից”  (“All risks”): Ի՟նչ է սա նշանակում: 

“Բոլոր ռիսկերից” ենթադրում է ապահովագրական հատուցում ռիսկերի համեմատաբար ավելի լայն շրջանակի համար, սակայն դա ամենևին էլ չի նշանակում, որ հատուցվում են բոլոր պատահարները, քանի որ “բոլոր ռիսկերից” ապահովագրությունը նույնպես ունի բացառություններ: 

ԲԱՌԱՐԱՆ

ապահովագրություն – օրենսդրությամբ և ապահովագրական պայմանագրով սահմանված կարգով ապահովագրական պատահարների տեղի ունենալու հետ կապված ապահովադիրների կամ պայմանագրով նախատեսված այլ անձանց անձնական և գույքային շահերի պաշտպանության նպատակով ապահովագրողի և ապահովադրի միջև հաստատված հարաբերություն` ապահովադիրների կողմից վճարվող ապահովագրավճարներից ապահովագրողների ձևավորած ապահովագրական պահուստների հաշվին:

ապահովագրող, ինչպես նաև ապահովագրական ընկերություն –  ապահովագրական գործունեություն իրականացնող մասնագիտացված բաժնետիրական կամ սահմանափակ պատասխանատվությամբ ընկերություն, որը որոշակի վճարի դիմաց իր վրա է վերցնում ապահովադրի ռիսկի նյութական հետևանքները և ապահովագրական պատահար տեղի ունենալու դեպքում ապահովադրին/ շահառուին հատուցում է վնասը կամ վճարում ապահովագրական գումարը:

ապահովադիր – ապահովագրողների հետ ապահովագրության պայմանագիր կնքած ֆիզիկական կամ իրավաբանական անձ:

ապահովագրական բրոքեր – ապահովադրի հանձնարարությամբ և նրա անունից ապահովագրական միջնորդային գործունեություն իրականացնող մասնագիտացված բաժնետիրական կամ սահմանափակ պատասխանատվությամբ ընկերություն:

ապահովագրական գործակալ` ՀՀ տարածքում ապահովագրական գործակալի գործունեություն իրականացնելու համար Կենտրոնական բանկի ապահովագրական գործակալների ռեգիստրում հաշվառված անձ, որն իրականացնում է ապահովագրական միջնորդային գործունեություն` անձի կողմից մեկ կամ մի քանի ապահովագրական և/կամ վերաապահովագրական ընկերությունների անունից և հաշվին:

ակտուար` օրենքով սահմանված համապատասխան որակավորում ունեցող անձ, որը մաթեմատիկական, վիճակագրական և այլ մեթոդների կիրառմամբ գնահատում է որոշակի իրադարձությունների տեղի ունենալու հավանականությունը և հաշվարկում է ապահովագրական սակագների, ապահովագրավճարների, ապահովագրական գումարի, տեխնիկական պահուստների, կենսաթոշակի, անուիտետների և այլ նմանատիպ ցուցանիշների չափերը:

ապահովագրության օբյեկտ – ապահովագրության ենթակա օրենսդրությանը չհակասող անձնական և գույքային շահ:

ապահովագրության պայմանագիր – ապահովագրողի և ապահովադրի միջև առաջացող հարաբերությունները կարգավորող և նրանց միջև կնքվող գրավոր համաձայնություն, ըստ որի սահմանված ժամկետում ապահովադրի կողմից վճարվող ապահովագրավճարների դիմաց ապահովագրողը պարտավորվում է ապահովագրական պատահարի առաջացման դեպքում կատարել ապահովագրական հատուցում կամ վճարել ապահովագրական գումար ապահովադրին կամ այն անձին, որի օգտին կնքվել է պայմանագիրը:

ապահովագրական ռիսկ – պատահարի (դեպքի) տեղի ունենալու և (կամ) վնաս հասցնելու հավանականություն, որի հետ կապված իրականացվում է ապահովագրությունը:

ապահովագրական գումար, ինչպես նաև ապահովագրական ծածկույթ – կամավոր ապահովագրության դեպքում` ապահովադրի և ապահովագրողի համաձայնությամբ որոշված, իսկ պարտադիր ապահովագրության դեպքում` օրենքով սահմանված դրամական արտահայտությամբ գումար, որի սահմաններում ապահովագրվում է ապահովագրության օբյեկտը:

ապահովագրավճար – ապահովագրության համար նախատեսվող գումար, որն ապահովադիրը կամավոր ապահովագրության դեպքում` ապահովագրության պայմանագրի, իսկ պարտադիր ապահովագրության դեպքում, օրենքի համաձայն, պարտավոր է մուծել ապահովագրողին:

ապահովագրական սակագին – սահմանված ապահովագրական գումարի նկատմամբ ապահովագրավճարի դրույքաչափ, որը կամավոր ապահովագրության տեսակների համար որոշվում է ապահովագրողի կողմից, իսկ պարտադիր ապահովագրության տեսակների համար սահմանվում է օրենքով:

ապահովագրական հատուցում – դրամական արտահայտությամբ գումար, որն ապահովագրողը գույքային ապահովագրության պայմանագրով, ապահովագրական գումարի սահմաններում, պարտավորվում է վճարել ապահովադրին կամ շահառուին` պայմանագրով նախատեսված ապահովագրական պատահարի հետևանքով առաջացած փաստացի վնասների կամ կորուստների դիմաց:

ապահովագրական գաղտնիք - ապահովագրական գործունեության ընթացքում ապահովադրի, ապահովագրված անձի կամ շահառուի վերաբերյալ ապահովագրողին, վերաապահովագրողին, ապահովագրական միջնորդություն իրականացնող անձի հայտնի դարձած ապահովադրի, ապահովագրված անձի կամ շահառուի առևտրային գաղտնիքը կամ այլ տեղեկություն, որն ապահովադիրը կամ ապահովագրված անձը մտադիր են եղել գաղտնի պահել, և ապահովագրական, վերաապահովագրական ընկերությունները կամ միջնորդը տեղյակ է կամ պարտավոր էր տեղյակ լինել այդ մտադրության վերաբերյալ:

Տերմինները և նրանց բացատրությունները բերված են 2007թ.-ի ապրիլի 09-ին ընդունված “Ապահովագրության և ապահովագրական գործունեության մասին” ՀՀ օրենքից: